Category: No.1

CCC THANGLAWI Vol. 7, No. 1, January 2011

2/6/2011

CCC THANGLAWI (Vol. 7, No. 1 January 2011)

Editor Cabuai in

Careltu dihlak nan kut in kan tlaih hna. 2010-11 cacawn kum kum donghlei kan panh cuahmah cang. Kum khat hi ngan a dam mi ca ahcun chikkhatte a lo nain zawtnak he a ril komi ca ah kum khat liam hi a har ngaingai. Cu ve bantukin phaisa chambau lo tein a nung khomi sianginn ca ahcun kum khat liam cu a rang ngai ko nain ngeih ruang ah si loin herh ruang i dirhmi Bible sianginn kan ca ahcun kum khat chuah lai hi kan ruahnak nih a phanh leng pi a si. Kum dongh camipuai zong kan naih cuahmah cang. Caan karlak ah zawtfah, damlonak le a dangdang ruangah kan fale camipuai tuah khawh lo tiang kan um sual nakhnga lo thla kan cam. Hi kum khat chung ah chambaunak tampi lak ah mualpho lo tein kum a kan dihtertu le lam a kan hruaitu Pathian kan thangthat! Lamhlat lamnai in CCC a daw i a dirpitu nan dihlak cung ah kan i lawm fawn.

            A thar in vun cuanh than tikah 2010 kum cu kan caah kum theihtlei a si. Pathian nih pumpululh chuihnak certual a kan limter. Kan ram ah thimnak a um. Kan tha a nuam. Minung fa ciocio, holh dawh lo le bia chiakha in i sik le i ti lengmangnak aw thawng zong zatlang lam ah a um ti lai lo i Laimi kan lungput zong a sang deuh lai, aa remh deuh lai tiah ruahchannak kan ngei.

            Cun 2011 kum cu kan dihlak caah thluachuahnak kum, demokaresi hruainak taktak tang ah kan um hmasabik kum a si lai caah rian kan tuannak zong ah hma a kal deuh lai, kan herha a kok deuh lai ti kan ruah tikah Pathian kan thangthat.

CCC Fun Fete

            CCC nih kum khat voikhat a tuah tawnmi Christmas Fun Fete cu sianginn calendar ning ah cun Dec. 11, 2010 ah tuah dingin timhlamhmi a si nain nikhuachiat ruang le hmunhma tlonlennak relrem lo ruangah January 8, 2011 ni tu ah sunglawi ngai in CCC sianginn hmun chung ah kan tuah khawh. Khuachung in khan khat le cheu tluk a hlatnak hmun ah tuah a si nain minung zong kan tam ngaingai. Nikhua zong a tha i mi thinlung ah phundang tein Fun Fete rim a hmui thiamthiam ko.

            Hlasakthiamnak thawng in USA tiang a phanmi Pa Solomon zong nih hlasaknak in tha a rak kan pek caah kan i lawm ngaingai. Thazaang chuah in a kan tanpitu Khrihfabu kip le hawikom dihlak nan cung ah lunglawmhnak roca kan tial. Kan hmuhmi dihlak Ks. 2,091,585 a si. Hmailei CCC riantuannak ah tampi a kan bawmhchanh lai ti ruahchannak kan ngei. Pathian nih thlua in chuah cio ko hna seh!

Kan ngaihchiatpi hna!

            CCC ah B.Th I a kai liomi Bungzung Tipil Khrihfabu, Senthang Baptist Association, in Pa Van Thawng i a pa Pu Khua Hei nih January 24, 2011 nih ah mual a kan liamtak. Sianginn kai lio i hibantuk hringtu pa nih liamtak ton cu a fak ngaingai ko.

            Laimi kan pa lawng si loin CCC le ram leng pehtlaihnak caah pehtlaitu dirhmun in kumsau pi a kan dirkamhtu Rev Dr. Sang Awr nih January 16, 2011 nih ah nunnak dangah a kan thialtak. CCC chungkhar dihlak zong nih an ngaihchiatnak ah kan i hrawm ve. Pathian nih kaltak mi chungkhar an mitthli hnawhpiak hram ko hna seh!

Final Examination

            2010-2011 cacawn kum Final Examination cu February 7-25, 2011 ah tuah a si lai. A cheukhat siangngakchia ca ahcun teinak hmuhnak dingah rikhiahnak zong a si. A cheu siangngakchia ca ahcun catang kainak rikhiahnak a si fawn. Tlamtling tein camipuai kan tuah khawh nakhnga thlacam piak kan herh.

Kan lawmhpi hna!

            December 30, 2010 (nilini) ah CCC i Accountant a tuan lio mi Bessie Ngun Tha Par le Martin Kam Lo (Pastor, Bethel Baptist Church) hna i thitum thlacamnak le January 14, 2011 (ningani) ah Cung Lian Thawng (Librarian) le Zachi John hna i thitum thlacamnak le an lunglawmhnak ah CCC chungkhar nih kan lawmhpi hna.

Visiting Professors

            M.Div program caah special in sawmmi Visiting Professor Rev. Dr. Lawha Ling (Principal, Zomi Theological College) cu January 17-19, 2011 nithum chung Interfaith Dialogue a kan chimh. Siangngachia caah tampi mit a kan auter lawng si loin CCC Academic lamthluan zongah rian tampi a kan limpi tiah kan ruah. Ruahnak, thazaang, caan pek in a kan bawmtu Rev. Dr. Lawha Ling cungah lunglawmhnak roca kan tial. Hmailei ZTC a hruainak le a riantuannak ah Pathian nih tam chinchin in thluachuah pe ko seh!

            Rev. Dr. B. Luai Hre (Khualsim Bible lettu) zong CCC nih kan sawm bantukin tu zarh chung ah a ra zau lai tiah thawng kan theih. Hmailei ahcun ramdang um Laimi zong nih CCC ah cachimh ding in nan kan tlawng ve te lai.

Accreditation Visit

            ATESEA thithruainak in kum li ah voikhat tuah tawnmi Bible Sianginn hlathlainak cu ramdangmi luhkhawh lo ruangah Local Accreditation Team in riantuantu pa thum, Rev. Dr. Lincoln (Vice principal, Kothabyo Theological Seminary, Pathein), Lecturer Tu Hkhawng (Director of Admissions, Kachin Theological College, Nawngnan) le John Thet Lwin (Librarian, Holy Cross Theological Seminary, Yangon) hna cu January 27-28, 2011 ni hnih chung CCC sianginn a dirhmun le a sining hlathlainak an ngei. Hi program ah ATESEA nih tahnak pedaan a tuahmi ah CCC nih a tlam a tlinh maw, tlinh lo ti le zeitindah an i cawmning, an cachimhning le an i thithruaining a si ti kha biapi tein an hlathlaimi a si. Ramchung, ramleng bawmchantu Laitlai unau le a dangdang hawikawm hna thawngin cu rikhiahmi tahnak chungah CCC zong kan lut kho cuahmah ko ti kan hmuh. Lam a kan hruaitu Pathian kan thangthat hringhran.

Khualtlawnnak

            December 7- 9, 2010 ATESEA accreditation team workshop le ATEM annual meeting, Yangon ah Principal Henry Siang Kung a kai.

            ATESEA in a rami Accreditation Team he Shan State Baptist Theological Seminary, Taunggyi ah February 6-7, 2011 nihnih chung sianginn hlathlainak an ngei lai.

Retreat!!

            CACC BM hnatlakpinak bangin CACC i riantuantu le CCC caantling riantuantu, hrimhthannak program cu December 14-22, 2010 ah Shan ram Muse ah nuam ngaiin kan tuah. A kal kho mi kan dihlak minung 27 kan si. Nihnih chung Tuluk ram Shwely le an District Myodaw a si mi Mangshi zong kan va cul dih. Hmun nuam le hmun dawh ngai a rak si. A cheukhat cu a khuahkhuah in an kal kho, a cheu kop ngei lo zong kan i tel. Phanh ballonak hmun le hma a si tikah hmuhtonmi thil thar tete an um len. Muse i ni thum kan cam chungah riahnak hmun a kan hlantu Shan Baptist Church, Muse hna sin ah lunglawmhnak roca kan tial. An khrihfabu ah CACC GS le riantuantu cheu khat nih thawngtha chimnak le a dangdang caan hmannak he an telpi hna. Cun Mungbaw Kachin Baptist Church, Muse zongah CCC principal le hlasatu minthang cheu khat nih thawngtha chimnak le “A Hme Ram Laitlang” hlaremhdawh saknak in an telpi hna. An hlasak le an thawngtha chim nih an lung a suk ngaingai hna.

            Muse um Lai Baptist Church sin zongah pumhpinak he caan kan hmang kho. Hi Khrihafbu hi Upper Myanmar Chin Baptist Association (UMCBA) chungtel a si. Chungtel minung 15 hrawng lawng an si. An i zuamning hi khuaruahhar a si. Tlakrawh biakinn thar an sak lio pi a si. Camphiu cawknak a um ti lo i CCC le CACC i bawm in chimtlak lo te kan bawmhtak ve hna.

            Hi program ah aa tel khomi dihlak caah chanchung philh khawh ti lo dingmi hmuhtonnak a si. Riantuantu pakhat le pakhat karlak ah hmuhthiamnak hri a sih chin bantukin Laimi le Pathian caah lungrual tein tantinak thazaang a kan petu a si hrimhrim lai kan zumh.


Thawngpang

            CACC Officers Council dihlak January 17, 2011 (nikhat ni) ah ZBC hruaitu upa hna he i tonnak, bia i ruahnak ZBC zung, Falam ah an ngei.

            A ra laimi March 6, 2011 (Sunday) suimilam 2:00 pm ah Hakha Baptist Church ah a voi 18 nak CCC Graduation Service tuah a si lai.

            2011-12 cawn kum ah CCC ah M. Div., B.Th., B. A. (English), B.R.E le B. Min. program i kai a duh mi hna caah luhnak ca (Application Form) CCC Office ah cawk khawh a si cang.

Assistant Librarian rian a lawng

            CCC Library ah kan riantuan hawi a si mi Pu Lian Kim pension la ding a si cang caah amah Post ah Assistant Librarian pakhat kan herh. Sok a duh mi nih CCC Office ah hlathlai khawh a si. Soknak ca cu February 20, 2011 (Sunday) a hnubik zung phanhter ding a si lai.

Lunglawmhnak!

            MIT luhnak camipuai ah CCC Alumni chungin minung 8 nih M.Div program luhnak an phi i an dihlak tein an awng. Cun M.Th. caah minung pakhat nih a kan awnpiak fawn. CCC sianginnchuak hi an thiambik ca ah a si theng lai lo. Pathian nih kan sianginn le kan tuanbia a kan cawisannak a si ti kan ruah. Awnnak a kan hmuhpiaktu kan fale cungah kan i lawm hringhran. Lamnai in hi teinak hmuhnak ding caah rethei in a kutrit i ca a zohpitu hna hawikawm dihlak cungah kan lunglawmhnak kan langhter. Awnnak a hmu mi:

1. Ca Cung Bik, M.Th (TABC)
2. Rev. Win Shwe, M.Div (HBA)
3. Aung Tin Win, M.Div (GBA)
ha Cung, M.Div (CBA),4. John T
5. Bawi Dua, M.Div (CBA)
6. Run Ling Thang, M.Div (GBA)
7. Thawng Luat, M.Div (ZBA)
8. Van Bawi Lian, M.Div (HBA)
9. Thang Chin Lian, M.Div (GBA)

Restricted Circulation

12 Comments

CCC THANGLAWI, Vol. 5, No. 1, January 2009

2/6/2011

10 Comments

CCC Thanglawi        Vol. 5               No.1                January 2009

Principal Cabuai in

            Hmaisabik ah kum 2009 tiang lam a kan hruaitu Pathian ka thangthat. Kum Thar Lawmhnak nan cung tlung ko seh.

            Minung nih “caan a liam” kan ti. A taktak ahcun caan cu a liam lo, a liam khomi cu minung kan si. Minung nih caan kan uk lo, kan ser kho fawn lo. Caan nih minung a uk i minung cu caan chung ah kan um. Cu caah caan cu a hmun zungzal nain minung cu kan liam lengmang. Cuticun kum 2008 cu kan kal tak, kan liam tak i 2009 kan phan . 2009 phan manh loin a liam mi hawidawt tampi an um. Liamtak mi chungkhar ngaihchiatnak le lunglennak ah kan i hrawm ve.

Grik holh a thiam mi nih caan cu phunhnih ah an then: “ Chronos,”le “Kairos” an si . Chronos cu nizan, nihin, le thaizing ti in zapi nih kan hngalh mi caan le chan , nithlarelnak phun hi a si. Cu caan relning cun AD 2009 kan phan cang.

Nihchuak Biaruahnak

Biaduh:           CCC ah ahodah a ngan bik?

Hmursau:        Bote.

Biaduh:           Ziah?

Hmursau:        A lung a ngan.

Biaduh:           Na duhmi ka hal ve.

Hmursau:        CCC caah a har bikmi?

Biaduh:          Phaisa kawl le 2% thawhvo leiba cawh..

Hmursau :       A fawi bik mi tah?

Biaduh:           Phaisa hman!

Hmursau :        Semrel tein phaisa hman cu a har tuk dah kaw!

Telephone Thar : 21888

            Library caah tiin kan halmi telephone cu bunh a si cang. Pa sianghngakchia zohkhenhtu

(Male Warden) umnak inn le library ah bunh a si. Library le Hostel um mi Sianghngakchia cu 21888 ah chonh khawh a si.

            Kan ngeih cang mi nambar 21339 kha cu office le nu sianghngakchia umnak (Female Hostel) ah bunh a si. Telephone bunhnak nawl a kan petu le bunhnak phaisa a kan bawmtu cung ah lunglawmhnak chim cawk lo kan ngei.

            CCC siangakchia chonh caan cu zaanlei 4:00 pm hnu le zinglei 9:00 am hlan ah a tha bik. Chun hnu 1:00 pm in 2:00 pm hi chuncaw ei can a si. Ca cawncaan a simi 9:30 am – 1:00 pm, 2:00 – 4:00 pm cu siangngakchia ca an cawn lio a si caah telephone chawnh awkah thil laklawh deuh a si. Minung kan si bantuk in a herh tukmi – thilawhnak kong tbk – ahcun au piak khawhmi cu auh piak a si nain a hlat deuh ah a um mi le au awk ah a tlam a tlinglo mi cu bia cah khawh a si ko.

Khualtlawnnak

            Rev. Hrang Awi le H. Siang Kung cu December 9, 2008 ni Mandalay ah Denmark le Norway in a ra mi Baptist hruaitu hna he tonnak an ngei. Cu dih in H. Siang Kung cu Yangon ah tluangdang in a ra mi hawikom ton ah a kal.

Gospel team

            Christmas sianginn khar (2008) chung ah Gangaw Baptist Association (GBA) ah bu hnih, Chin Baptist Association (CBA) ah bu hnih, Gospel Team kan kal kho. Gangaw lei ah Lecturer Siang Zi, Lecturer Vel Hlei Sung, Librarian Cung Lian Thawng le Assistant Librarian Thawng Cung Nung nih an zulh hna. CBA, Kalay-Tamu peng ah Rev. Tluang Ceu (Treasurer) le Lecturer Ngun Cer Chin nih an zulh hna. Dam tein an rak phan than i Pathian kan thangthat. CCC Main building caah thawhlawm an pek khawhmi cu:

CBA …….      K. 1,175,600

GBA ……      K.    550,850

A dihlak …… K. 1,726,450   a si.

            Laimi umnak ah mautaam ruang ah siseh, vawleicung chawtuahnak a tlaktuk naknih a kan den ve ruang ah siseh, harnak tampi lak ah hi vialte an pek khawhmi cung ah kan i lawm ngaingai.

            “Kairos” cu nithlarelnak in rel khawh le tah khawh a si lo. Hlawhtling lak in, a phi chuak tiang in tuahnak le tuahmi he aa tlaimi biafang a si. Tahchunhnak ah voikhat voihnih tiah kan rel mi khi “Kairos” phun caan rel ning ah a tel kho. Lai lei nu le pa nih chimtawnmi caan biafang pakhat tahchunhnak in chim ahcun “zei can dah a rauh?” ti an chim duh tikah “buh um ti a so fangfang hrawng khi a rau,” tiah an ti tawn.

            Kawlram ah Laimi chung in bass tingtang tumthiam Victor Za Lian (ACES) nih capo a saihmi nihchuak bia pakhat cu “Zei can dah a rauh?” ti mi kha caan tawite lawng a rau ti chim a duhnak ah “voih voikhat voih tluk a rau,” a ti. Voih i voih mi a rim a loh hlan karlak caan khi a chim duhmi a si. Cubantuk thil tuahmi le a simi cung ah caan a tawi le a sau tahnak hi nithlarelnak in caan tah nakin a tha deuh i a herh zong kan herh.

            Mi cheukhat cu Chronos caan in kum 100 reng lo chansau pi nun zong ah tuahmi     “Kairos” lei ah an chan a tawi ngai. Cheukhat cu Chronos caan in kum tlawmte lawng an nung, an chan a tawi nain tuahmi “Kairos” ah thil tampi an tuah khawh. Dawtnak rim an chuah ter, thanchonak rim thaw an um ter.

            “Kum Thar Lawmhnak Na Cung Tlung Ko Seh,” kan ti mi hi nithlarelnak in caan le kum rel ti loin tuahkhawh mi thil cung ah caan hi rel kho u si law Kum Thar Lawmhnak cu a tling chinchin hnga.

Ngaihchiatnak

CCC ah sianginn akai lio mi Nu Tial Tha Rem (BA II) i hringtu a pa Pu Thla Mang (Kum 53) nih January 2, 2009; Nu Zung Rem Ci (B.Th IV) i a ta Pu Thla Hre (Kum 40) nih December 19, 2008 ni ah pumsa in an kan liam tak. Chungkhar an ngaihchiatnak ah kan i hrawm ve.

Lailungrawn Eidin Dawr

CCC Nubu le CCC office i bawm in sakmi Lailungrawn Eidin Dawr saknak rian cu lim a si cang. CCC office nih a cung cih caamphio le thinghak tung pawl rinh a si. A dang a herhmi vialte caah CCC nubu nih Ks. 3,650,665 an kawl chap. January 5, 2009 ah Rev. Tin Hmung thlacamnak in Pathian sin pekchanhnak le dawr hun thlacamnak tuah a si.

Staff Quarters

CCFDK bawmhnak in sak liomi CCC sayate umnak inn cu a vanpang tlakrawh rual le a cung cih aa lim cang. Rak khankhahmi nakin tamdeuh dih ding a si. January 7, 2009 ah Building Committee meeting an thu i harnak dangdang a um lo ahcun a ra laimi February thla chung ah lim khawh a si lai ti a si. Bawmtu cung ah kan i lawm ko.

San San Myint he Tonnak

TL:     Na dam maw? Zeidah na kai lio?

SSM: CCC ah Dip. Th. kum linak ka kai lio.

TL:      Zei miphun dah na si?

SSM:   Asho Chin.

TL:      Na chuahkehnak tah?

MSS:   August 29, 1986 kum Dalek khuate, Aan myone, Rakhine State, ah ka pa U Maung Tun le ka nu Daw Aung Kyi (tlei cia) nih an ka hrin. Fanu fapa 10 lak ah pakuanak ka si.

            Panga nih an ngakchiat lio in an kan thih tak i a nung mi pa nga kan si.

TL:      Khirihfa na sinak kong theih kan duh ko.

SSM:   Ka nu le ka pa cu Khrihfa an si lo. Kan sinah missionary in a rami Saya Bawi Hia thawng

            in Khrihfa ka si. 1997 ah tipilnak ka ing. Chuahpi tafar kan dihlak Khrihfa kan si.

TL:      Zeitindah CCC na phak?

SSM:   Lautu Baptist Association (LABC) khuakhan piaknak in ka ra. Tang kua lawng ka awn

            caah Dip Th ka kai. Hakha khua, Pyidawtha sang, Mucu veng um mi Pu Phung Huat le

            chungkhar nih an ka cawm.

TL:      Lai Holh na thiam maw?

SSM:   Kum hnihnak ka kai in cun tlawmpal tete ka thiam. A tu cu vansan ahcun phung zong ka

           chim kho ko hnga.

TL:      Cacawn na lim in zei dah tuah na timh?

SSM:   Khua ah Pathian rian tuan ding ka tim. Asi khawh ahcun ca cawn peh ka duh.

TL:     Lungsau tein na kan leh caah kan i lawm.

SSM:   CCC Sayaci le riantuantu dihlak cung ah ka lawm ve. Tukum ah David Za Hre Lian

            Scholarships bawmhnak nan ka pekmi cung ah ka lawm fawn.

CCC he pehtlaihnak

Telephone: 21339 (office le Nu hostel)

                    21888 (Library le Pa hostel)

10 Comments

Author

CCC THANGLAWI Blog a si. Mahka hin Thanglawi thawngca vialte chiah dih awk a si lai. Tawlreltu hna nih siaherhnak le dawtnak, zonruahnak taktak he caan pek in chiah izuam hram ko u. Roca bantuk, CCC tuanbia a si ca ah biapi in ruat cio hna usih.

CCC THANGLAWI Vol. 7, No. 1, January 2011

CCC THANGLAWI, Vol. 5, No. 1, January 2009

Author

Archives

Categories