Khua pakhat ah Kurbungbel timi tlangval pakhat a rak um. A mui a chiat tukning hi a ruh a ngawi, a mit a cei, a ngal zong a kawi. Thlalang aa bih ah amah le amah hmanh aa ttih. A mui a chiat tuk ruangah innleeng hmanh chuak ngam loin innchung ah aa benh peng tawn.
Voikhat cu innchung ah Caicim (zute) a tlaih i, ka thah lai ati ah khin Caicimte nih cun, "Ka pu Kurbungbel, zaangfahnak tein ka that sawh hlah, ka thlah ko; cun, nangmah caah nupi kan kawl piak lai" a ti. Kurbungbel nih cun "hitluk ka muichiat hi zeitindah an ka duh khawh lai" a ti. Caicim nih cun, "An in duh ko lai" a ti i, that loin a thlah. Cucaah, Cacim cu unaurual ngaknu pathum umnak inn chungah a vung lut i, "Ka pi le ka pu, nan fanule lakah pakhat khat tal nih Kurbungbel an vaat lo ahcun nan chungpi tein nan ci a mit dih lai" a ti i, lo diam a kal taak hna.
Ngaknu nu le pa cu an khuaruah a hartuk i, cuti kan chungpi tein kan ci a mih dih nak cha cun kan vaat ter ko hna lai ta, an ti. An fale lo lam tlun cu an hngak. Upa cem nu a hung tlung i, a pa nih a rak don. Ka fanu, "Kurbungbel nan vaat lo ahcun nan ci a mit dih lai an kan ti i nangmah nih tah na va't ko lai" tiah a von ti. Nemmam, Kurbungbel va't nak cun kan chung zapite kan ci mih dih hmanh ka duh deuh. A lai nu a hung tlung ve. A pa nih cun a von hal tthan. A u bantuk tthiamtthiam cun a leh ve. A nu le a pa cu an thin a phangtuk cang. An fahniang telawng a taang cang. Tlawmpal ah an fahniangte cu a hung tlung i, an hei don. A nu le a pa nih cun, kan fahniang dawt te an ti i an zitmuai pah in thil sining cu an chimh. An fahniang nute cu aa ruat, a nu le a pa cu a zoh hna, Kurbungbel va't ding cu a zenh tuk ve. Thlawmpal ah, "Ka nu le ka pa, kan chungte i kan ci a mih dih nak in cun ka va't ko lai" a ti hna. A nu le a pa cu an i lawmtuk hringhran. Cuticun, Kurbungbel cu an va't ter. Nain, Kurbungbel lo a kal kar poh ah a nu le a pa inn ah a um i zaan lawngah a ttin tawn.
Voikhat cu an khuapi tein tiva ah hru kan denh hna lai an ti i Kurbungbel zong an sawm ve. An nu nih cun a thil a timh piak i aa thawh. Tiva a pha'k ah cun hru cu an deng le'n cang. Chunnitlak an i nuam. Tlun a za't lai te ah khin Kurbungbel nih cun ngataisawm pakhat a tlaih. Ngataisawm nih cun, "ka thlah law na mui hi ka'n remh dih lai" a ti. Cu le cangka rianrang in Kurbungbel nih cun a thlah. Ngataisawm nih cun, "thinghnah va la" a ti i, thinghnah pakhat a va la'k. Cu thinghnah in cun a pumpaluk a hnuai piak dih. Cu khawh cun, "Zu tongh lo le va tongh lo ti ah vaa kholh" a ti. A va kal i, zu tongh lo le va tongh lo ti ah cun a vaa kholh. Cu le cangka, Kurbungbel cu a ruh aa remh dih i mipumrua ttha, mimuidawh taktak ah aa chuah. Aa dawtning hi zohchim lo bak in aa dawt, ti asi.
Zaanlei a hung si i tiva kal pawl cu an tlung thluahmah. A nupi nih cun ziah ka vapa hi a tlun ve bal hnga lo tiah innka hram in a cuanh peng ko. A vapa an inn hmai a pha'k ah khin an nu nih cun mahtluk padawh cu a hodah asi hnga tiah a lungthli tein a ti len lio ah cu pa cu an innchung ah a hung lut. An pa asi a hngal ti lo. Kurbungbel nih cun "ahodah mahti cun na cuanh le'n ee... a hei ti. Ka vapa henta ka cuanh ko; hawidang cu an tlung thluahmah cang; ka vapa belte tlun aa zaal ti lo, a ti. Muidawh pa nih cun "keimah hi pei na vapa cu ka si cu" a von ti. An nu nih cun a zum kho lo. Nangmah cu hi tluk in naa dawh, na pumrua le a ttha; kei ka vapa tham cu mi muichia, mi ruhkawi pei asi ko cu, a ti. Asi lo ee... keimah hi ka si ko. Kan tlun lai ah ngataisawm ka tlaih i, "ka thlah law na ruh ka'n remh piak dih lai" a ka ti i a ka remh bia asi. An nu nih cun a zum set lo. Kurbungbel nih cun, "Kan nu na pale sur kan hlan mi hna pe'k pah in ngasa hi va cawih ve hna" a hei ti. Cu ceo cun an nu nih cun a zumh i aa nuamtuk hringhran. A vapa cu zoh a chim kho hrim lo. A pawng um lawngte a duh cang. A nu le a pa inn ah cun sur le ngasa pe'k ah cun a va kal i innleeng par in... "heh nan sur...ngasa he ka'n pek hna" a ti i a hei hlawnh i, lo vurmar inn lei ah a tli colh. A nu le a pa cu an khuaruah a hartuk i upa nu kha zei ko dah asi hnga vung zoh tuah hna an ti. Upa nu cu a vung kal i Kurbungbel a zohnak ah ttin zong a thei ti lo. A unu a ttin ti lo caah a changtu nu an kalter tthan. A unu bantuk tthiamtthiam incun a naunu vapa a zohnak ah ttin a ngal ve ti lo. An nu a va kal ve i cu tthiamtthiam. A hnubik ah an pa a va kal. A fanu vapa cu a va hmuh tikah aa nuam kho tuk i, hitluk muidawh cu an um ti bal lai lo, a ti.
Voikhat cu Kurbungbel cu khual ka tlawng lai a ti i, an nu cu fa a pawi caah khoika hmanh ah chuak lo dingin ti a than piak dih, thing a luh piak dih, azei zongte a tuah piak dih ta. Cuhnu ah, "Kan nu khua leeng ah na rak chuak hrimhrim lai lo, na chuah ahcun na ule nih an in thah sual lai" tiah a cah. Cu khawh cun, Kurbungbel cu khualtlawn ah aa thawh, ti asi. A unu bik nih cun a naunu cu a hnahchuah i, "Ka nau hi ka thah lai i keimah nih a va hi ka co lai" a ti. Nikhat cu a unu cu a ra i, "ka nau, nan vok rawl na pe cang maw?" a hei ti. A nau nih cun, "ka pek cang" a ti. "Nan a'r rawl na pe cang maw?" a ti tthan. "A'r rawl zong ka pek dih cang" a ti. "Ka nau, rak chuak law ti kan i kholh lai" a ti tthan. "Ka u, kan pa nih ti kholhnak cu a ka than piak dih cang" a ti. Asiah cun, "rak chuak law pipen i cit usih" a ti. "Ka huam lo"a ti. A unu cu zeiti awk a hngal ti lo. Caan sau nawn a rauh hnu ah khin, "Ka nau, pipen kaa thuinak ah kawlvai lei ah nan pa ka hmuh" a von ti. An pa hmuh cu a duhtuk ve caah leeng ah a hung chuak i, pipen cu a cit ter. Pipen aa thui saling ah a u nih cun a nam i horcakuak chungah a thlak. A u cu vantthat a ti i, a naunu bantuk tein aa thuam hnu ah durkaruk (tithawl) aa pawiter.
Kurbungbel cu a khualtlawnnak in a hong tlung i an nu pipen a sih piakmi tangin nau ttah thawng a theih. A thil aa tthum i an nufa cun a va laak hna. A paiper chungah khan a thuh hna. Inn chungah a vung lut i a unu deuh nih cun, "Aww...kan pa, na rak tlung cang tih" a hei ti. "Kan nu, voidang na lo lo ee...ka thil zong na ka cawih lo". "Asi khe, ka philh sual a ti i a thil cu a cawih. "Kan nu, voidang na lo lo ee... ti zong na ka suah lo" a ti tthan. "Aize... ka philh sual" a ti i ti cu a suah piak tthan. "Aa! kan nu, voidang na lo hrim lo ee... voidang ah cun ka tlun le cangka zeidah na ka phorh tiin ka thil na ka cawih" a hei ti tthan. "Aize, ka philh hoi ko lo mei" a ti i a paiper cu a hei zuanhnawh. A von kau cu a naunu le a fate a hmuh hna. A lautuk hringhran i zokzok in inn lei ah a tli. A tliknak ah a dukuruk pawimi zong cu a thlau taak, ti asi. Cu khawh cun, Kurbungbel nih a nupi le a fate cu paiper chungin a chuah hna i nuam tein khua an sa, an ti. Cuvial...a dong!
Careltu nan caah tthahnem santlai si hram ko seh. Lai tuanbia pakhat te kan fale kan chimh mi hna hmanh hi a sunglawi tuk fawh.
Thiangi pa
Maryland
Source:
From: Vanthawng Cung <[email protected]>
Subject: [Lai Forum] Kurbungbel tuanbia (A zuammi caah)
To: [email protected]
Date: Thursday, February 25, 2010, 10:27 AM